Home » ANALISTE TE FTUAR » LEDJAN PRIFTI: EDI RAMA NË VJENË: BANALITETI I SË KEQES

LEDJAN PRIFTI: EDI RAMA NË VJENË: BANALITETI I SË KEQES

Vizita e shumëpërfolur e Ramës në Vjenë është kthyer tashmë në një telenovelë të mbushur me mashtrime e intriga. Si çdo telenovelë politike  që respektohet edhe kjo pati skenën e vet në parlament duke lënë pezull spektatorët; a do të fillojë punën hetimore komisioni parlamentar ? Logjika ta do, që si pothuaj gjithë telenovelat e seritë televizive edhe kjo s’do të ketë një finale të denjë, do të vazhdojë në bazë të parimit tërhiq e mos e këput, derisa të bjerë numri i shikuesve e telenovela të mbyllet vetiu pa një finale.

Nuk ngeli njeri pa folur e shkruar, nga kryeministri tek gazetarët e analistët për të perfunduar në kafenetë e shtëpitë, a thua se po vendosej për shpalljen e ndonjë lufte për ekzistencë. E provokoi apo jo, u shkulën flokët, veshët apo basetat, plasi grushti apo u tërhoq kush prej mëngësh. Si komedi do të kish qenë interesante, mirëpo si ngjarje politike kjo ështe krejt e pangjyrë, e pashije, diçka patetike, një ndodhi krejt banale.

Kjo është edhe nisja de facto e fushatës elektorale e si thotë populli, dita duket që në  mëngjes. Banaliteti është mëngjesi i fushatës elektorale e ky banalitet do të na shoqërojë këto 2 muaj. Këta në të vërtetë nuk kanë çfarë të bëjnë tjetër për 2 muaj, shterpësinë e ideve dhe programeve duhet ta mbulojnë me gjithfarë palaçollëqesh e banalitetesh, historish të denja për hane e mejhane. Berisha do vazhdojë të flasë për rrugë e investime, të kuq e bllokmena, Rama do vazhdojë të flasë për taksën e sheshtë e Rilindjen. Por askush nuk duket t’i marrë seriozisht, prandaj meqë njerezia është e mprehur për fushatë nga halli do të pranojë gjithfarë banalitetesh e patetizmash vetëm e vetëm që të ketë me ç’të bëjë muhabet në orët e kafes.

Pas paktit te ngjalave, Rilindja në fushatë duket të ketë më shumë vlerë si Rilindja e Ramës sesa si Rilindja e Shqipërisë. A do të rilindë Rama ? A do t’ia dalë për dy muaj dhe si ?

Në mitologjinë greko-pellazge, kemi një rast interesant rilindjeje, ajo e Athinës. Miti thotë se Zeusi gëlltiti të emën, hyjneshën Metis, e cila si e do miti, e lindi Athinën brenda trupit të Zeusit, i përgatiti armatimin dhe mandej Efesti i çau Zeusit koken, nga rilindi Athina e armatosur.

Edi Rama pasi humbi gjithë imazhin e të qenit politikisht ndryshe Salës dhe pranoi të gëlltitej nga e Keqja, shpreson që këto muajt e fushatës të jetë në gjendje të rilindë. Mirëpo thonë se nqs të gëlltit e Keqja nuk mund të rilindësh përveçse prej anusit te saj, sepse e Keqja është banale, tepër banale.

Tashmë që Berisha dhe Rama, po luftojnë secili për të dëshmuar se janë e keqja më e vogel për Shqipërinë, do të na mbysë banaliteti. Nuk është Hannah Arendt, që zbuloi banalitetin e së keqes, ajo thjesht kuptoi atë që njeriu e ka zbuluar prej mijëvjeçarësh, që në kohën e të menduarit mitik. Konflikti e mirë- e keqe është universal, njeriu asnjëherë nuk ka parë si tërheqës konfliktin mes të këqijave, një më të madhe e një më të vogël, nuk e ka pare as si mësim për ta përcjellë, por e ka parë gjithnjë si diçka tepër banale për ta futur nëpër mite e mandej në histori. E Keqja për njeriun ka qenë përherë e kudo diçka banale, bëhej interesante atëherë kur mbante maskën e së Mirës apo luftonte kundër së Mirës. Beteja mes të këqijave lakuriqe, ka qenë gjithnjë diçka e pashijshme, e pahijshme, e pangjyrë.

Edhe pas kalimit të të menduarit nga miti tek logosi ( nga të menduarit mitik tek të menduarit logjik, racional), nuk ndryshoi asgjë tek përqasja e njeriut ndaj betejës mes të këqijave, ajo betejë nuk është e denjë për t’u ndjekur e për t’u kujtuar.

Kam bindjen se në Shqipëri po ndodh një revolucion në të menduarit, nga logosi po kalojmë tek ngjala ose të ngjalemenduarit. Të ngjalëmenduarit duket horizonti i ri i së ardhmes, nuk ka më një luftë mes të mirës për Shqipërinë e së keqes për Shqipërinë. E ardhmja e Shqipërisë do të jetë gjithnjë më pak e keqe, por gjithnjë e keqe, sepse sado të këmbehen në pushtet më pak të këqijtë, logjika thotë se përsëri e keqja do të jetë këmbëkryq, derisa të vijë i miri dhe e mira.

Të ngjalëmenduarit na detyron të quajmë ëndërr një Shqipëri të mirëqeverisur dhe prandaj ta ironizojmë çdokënd që mendon se Shqipëria një ditë do të behet, sepse duhet të bëhet. E megjithatë, pavarësisht kushtëzimit prej të ngjalëmenduarit, ka shumë njerëz në Shqiperi, të angazhuar politikisht ose jo, që ashtu si Martin Luther King, janë gati të bërtasin ”I have a dream”.

Po, të dashur ngjalëmendues, ne kemi një ëndërr, nje Shqipëri të mirëqeverisur, nje Shqipëri të bërë, një Shqipëri për shqiptarët e ndershëm e patriotë, mjaft me patetizmin dhe  banalitetin e së keqes.

 

2 thoughts on “LEDJAN PRIFTI: EDI RAMA NË VJENË: BANALITETI I SË KEQES

  1. Pergezime Ledjan une kisha shtuar dhe disa fjale shoqeruse per personin ne fjale por ndoshta nuk do ishin etike per personin qe ju jeni🙂
    Sh.Vladimir

  2. Shkrim i bukur, por fiks me idenë që kam dhe unë për gjendjen. Por ka ndonjë rrugë nda të shkurtër për të dalë nga tuneli? Duke parë dhe fundin tragjikomik të Kreshnik Spahiut

Comments are closed.